लालीगुराँस कोभिड नियन्त्रणमा प्रभावकारी हुने अनुसन्धानकर्ताको दाबी

नयाँ दिल्ली l हिमाली क्षेत्रमा पाइने लालीगुराँस फुल कोभिड नियन्त्रणमा प्रभावकारी हुने भारतीय अनुसन्धानकर्ताहरुले दाबी गरेका छन् ।  इन्डियन इन्स्टिच्युट अफ टेक्नोलोजी (आईआईटी) का अनुसन्धानकर्ताहरुले लालीगुराँसमा पाइने तत्व कोभिड नियन्त्रणमा प्रभावकारी हुने बताएका हुन् ।

कोभिड १९ संक्रमित भेरो इ६ कोषिका (अफ्रिकी बाँदरको किड्नीको कोष) मा गरिएको परीक्षणपछि वैज्ञानिकहरुको सो निश्कर्ष आएको हो ।

Advertisement

बायोएक्स सेन्टर स्कुल अफ बेसिक साइन्सका सहप्राध्यापक डा. श्याम कुमार मसाकपालीको समूहले लालीगुराँससहित अन्य हिमाली बनस्पति, दुर्लभ र अन्य औषधियुक्त जडिबुटीको बारेमा सन् २०१९ देखि अध्ययन गरिरहेको छ।

कोभिड संक्रमण फैलिएसँगै भारतीय अनुसन्धानकर्ताहरुले जडिबुटीबारे थप अध्ययन गरेका छन्। भारतमा पछिल्ला दिन दैनिक रुपमै लाखौँ मानिस कोरोना संक्रमित भइरहेका छन् ।

भारतमा पछिल्लो २४ घण्टामा मात्रै ३ लाख १७ हजार ५३२ जना संक्रमित थपिएका छन् । कोरोनाबाट हालसम्म ४ लाख ८७ हजार ७१९ जना संक्रमितको ज्यान गुमाइसको छन् ।