सभापतिको उम्मेद्वारी छोड्दिन : महामन्त्री कोइराला

✍️ नयाँपुस्ता डटकम २६ भाद्र २०७८, शनिबार २१:४४

चितवन । नेपाली कांग्रेसका महामन्त्री डा शशांक कोइरालाले आफू सभापतिको पदबाट पछि नहट्ने बताएका छन्। शनिबार पत्रकारहरुसँग कुराकानी गर्दै उनले पार्टीको १४औँ महाधिवेशनमा आफू सभापतिको उम्मेदवार बन्ने बताएका हुन्।

महान्त्री कोइरालाले भने, “हैन म कहाँ ब्याक हुन्छु । म त उठ्ने नै प्रयत्न गर्दैछु ।” महामन्त्री कोइरालाले पार्टीको महाधिवेशनमा संस्थापन इतरको साझा उम्मेदवार समय आएपछि बन्ने भन्दै आफू सभापतिको उम्मेदवारबाट पछि नहटेको बताए।

उनले जिल्लाहरुमा कांग्रेसको अधिवेशन चलिरहेको समयमा कार्यतालिका संशोधन गर्नु बाध्यता रहेको उल्लेख गर्दै क्रियाशील सदस्यता विवाद अझै २१–२२ जिल्लामा कायमै रहेको र यो विवाद मिलाउनका लागि कार्यतालिका संशोधन गरिएको जानकारी दिए।

क्रियाशीलको अन्तिम टुङ्गो छिट्टै लाग्ने उनले जानकारी दिए। एक फरक प्रसङ्गमा महामन्त्री कोइरालाले कम्युनिष्ट उच्छृङ्खल चरित्रका हुन्छन् भन्ने उदाहारण हिजो संसदमा भएको घटनाले पुष्टि गरेको बताए।

विपक्षीको धर्म विरोध गर्ने भए पनि हिजोको घटनाले संसद्को गरिमामाथि आँच आउने काम भएको बताउँदै उनले भने, उच्छृङ्खल चरित्रले कम्युनिष्ट पार्टीहरु चलिरहेका छन्।