वामदेव गौतमद्वारा एमाले छोडेको घोषणा, सचिवलाई बुझाए राजीनामा पत्र

✍️ नयाँपुस्ता डटकम १८ भाद्र २०७८, शुक्रबार १९:०५

काठमाडौँ । नेकपा एमालेका उपाध्यक्ष वामदेव गौतमले पार्टीबाट राजीनामा दिएका छन् । उपाध्यक्ष गौतमले पार्टी केन्द्रीय कार्यालय थापाथली पुगेर एमालेका सबै पदबाट राजीनामा दिएका हुन् ।

गौतमले केन्द्रीय कार्यालय सचिव शेरबहादुर तामाङलाई राजीनामा बुझाएका छन् । गौतमले आज दिउँसो पार्टी कार्यालयमै आएर राजीनामा पत्र बुझाएको नेकपा (एमाले) ले स्रोतले जनाएको छ ।

तत्कालीन नेकपामा विवाद आएपछि उपाध्यक्ष गौतमले पार्टी एकीकरण अभियान सुरु गरेका थिए । नेकपा विभाजन भएर पूर्ववत् एमाले र माओवादी केन्द्र पुनर्स्थापना भएपछि अध्यक्ष केपी ओली र बरिष्ठ नेता माधव नेपाल दुवै पक्षतर्फ छलफल चलाइरहेका गौतम पार्टी विभाजनपछि नेपाल नेतृत्वको नेकपा समाजवादीमा जाने चर्चा थियो।

तर पछि जनताको बहुदलीय जनवाद (जबज) नमानेको भन्दै गौतमले नेकपा समाजवादीमा पनि नजाने बताउँदै आएका छन् ।

यद्धपि गौतमले नव गठित दल नेकपा (एकीकृत समाजवादी) मा पार्टीको मुल सिद्धान्त जवज राखे समाजवादीमा प्रवेश गर्ने बताउँदै आएका छन् ।