प्रदीप नेपालले छाडे माधवको साथ

✍️ नयाँपुस्ता डटकम १४ भाद्र २०७८, सोमबार १८:१८

काठमाडौँ । नेकपा (एकीकृत समाजवादी) पार्टी आबद्ध नेता प्रदीप नेपालले सो पार्टी परित्याग गरेका छन्।

पार्टीले जनताको बहुदलीय जनवाद (जबज) सिद्धान्त छोडेको भन्दै नेता नेपालले आफू उक्त पार्टी नरहेको जानकारी दिएका हुन्।

नेकपा (एकीकृत समाजवादी) का अध्यक्ष माधवकुमार नेपालले धोका दिएको उनको आरोप छ। ‘तपाई पनि झेली कुरा गर्न सिक्नु भएछ। बारम्बारको कुराकानीमा मैले जबज हुँदैन भने मेरो नाम नलेख्नुस भनेको थिएँ। तर आखिरमा तपाईंबाट पनि मैले धोकाकै उपहार लिएर जानु पर्ने भो,’ नेपालले भनेका छन्।

नेता नेपालले आफू एमाले अध्यक्ष केपी ओलीसँग पनि नजाने उल्लेख गरेका छन्। ‘माधव कमरेड, म केपीसँग जान्न। किनभने तानाशाही प्रवृत्तिको म सधैं विरोधी हुँ’, नेता नेपालले सामाजिक सञ्जालमा लेखेका छन्।

यसअघि नयाँ दल विभाजनका लागि आफैँ निर्वाचन आयोग पुगेर माधव नेपालको पार्टीमा हस्ताक्षर गरेका नेपालले आजबाट सो पार्टी पनि छाडेका हुन् ।