अब काठमाडौँ छिर्न एन्टीजेन परीक्षण अनिवार्य, सार्वजनिक कार्यक्रम गर्न प्रतिबन्ध

✍️ नयाँपुस्ता डटकम २३ चैत्र २०७७, सोमबार १६:४८

काठमाडौँ । अब काठमाडौँ बाहिरबाट उपत्यका प्रवेश गर्दा अनिवार्य रुपमा एन्टीजेन परीक्षण गर्नुपर्ने भएको छ।

आइतबार बसेको जिल्ला कोभिड १९ संकट व्‍यवस्थापन समितिको बैठकले काठमाडौँ प्रवेश गर्ने नाकामा एन्टीजेन परीक्षण गर्ने निर्णय भएको काठमाडौँका प्रमुख जिल्ला अधिकारी कालीप्रसाद पराजुलीले बताए।

पराजुरीका अनुसार अब काठमाडौँ उपत्यका प्रवेश गर्ने नाकाहरुमा सम्बन्धित नगरपालिकाले स्वास्थ्य जाँच र एन्टीजेन परीक्षण गर्न हेल्थ डेस्कको व्‍यवस्थापन मिलाउने र सम्पर्क व्‍यक्ति तोक्नु पर्नेछ भने एन्टीजेन किट स्वास्थ्य कार्यालयले उपलब्ध गराउने छ ।

एन्टीजेन परीक्षणबाट नेगेटिभ देखिएको तर व्‍यक्तिमा लक्षण देखिइ शंकास्पद लागेमा पीसीआर टेस्टको स्वाब संकलन गरी पठाउन समेत समितिले निर्देशन दिएको छ।

सार्वजनिक स्थानमा गरिने कार्यक्रमहरु स्थगित गर्न र गर्नैपरे कार्यक्रमका लागि नेपाल सरकारद्वारा जारी गरिएको स्वास्थ्य मापदण्डको पूर्ण पालना गरी सञ्‍चालन गर्न समितिले आग्रह गरेको छ।