सम्झनाको विस्फोटक ब्याटिङले एसिया कपमा नेपालको यूएईमाथी शानदार जित

काठमाडौं । महिला एसिया कप क्रिकेटमा नेपालले विजय सुरुवात गरेको छ । उद्घाटनपछिको पहिलो प्रतिस्पर्धामा नेपालले यूएईमाथी शानदार जित हासिल गरेको हो । शुक्रबार श्रीलंकाको ‘दाम्बुल्ला इन्टरनेशनल स्टेडियम’ मा नेपालले यूएईलाई ६ विकेटले पराजित गरेको हो। खेलमा ओपनर सम्झना खड्काले विस्फोटक ब्याटिङ्ग गरिन् । उनले ४५ बलमा ७२ रन जोडिन् । खेल अवधिभर नटआउट रहेकी खड्काले ११ चौका प्रहार गरिन् ।

एसिया कपमा नेपालले पहिलो जित निकालेको हो। यसअघिका दुई संस्करणमा नेपाल सबै खेलमा पराजित भएको थियो। शुक्रबार यूएईले दिएको ११६ रनको लक्ष्य नेपालले १६.१ ‌ओभरमा ४ विकेटको क्षतिमा पूरा गर्‍यो।

Advertisement

पूजा महतो ७ रनमा नटआउट रहिन्। अर्की ओपनर सीता रानामगर ७ रनमा आउँदा कविता कुँवरले २ रन मात्र जोड्न सकिन्। कप्तान इन्दू वर्मा ६ रनमा आउट हुँदा रुबिना क्षेत्री १० रनमा बोल्ड भइन्। बलिङमा यूएईकी कविशाले ३ विकेट लिइन्।

त्यसअघि टस जितेको नेपालले फिल्डिङ रोजेपछि पहिले ब्याटिङ गरेको यूएईले २० ओभरमा ८ विकेटको क्षतिमा ११५ रन जोड्यो। यूएईका लागि खुसी शर्माले सबैभन्दा बढी ३६ रन बनाइन्। नेपालकी कप्तान इन्दू वर्माबाट क्याच हुनुअघि उनले ३९ बलमा २ चौका प्रहार गरिन्।