थप ४५ जनामा कोरोना संक्रमण, ७० जना निको

✍️ नयाँपुस्ता डटकम १३ आश्विन २०७९, बिहीबार २१:४६

काठमाडौं । नेपालमा थप ४५ जनामा कोरोना संक्रमण पुष्टि भएको छ । देशभर गरिएको १ हजार ३ सय ७ पिसिआर परीक्षणका क्रममा २५ जना र १ हजार ३ सय ७१ एन्टिजेन परीक्षणका क्रममा २० जनामा कोरोना संक्रमण पुष्टि भएको हो ।

कोरोनाका कारण आज पनि कसैको मृत्यु नभएको स्वास्थ्य मन्त्रालयले जनाएको छ । त्यस्तै, थप ७० जना कोरोनामुक्त भएका छन् । हाल नेपालमा १ हजार ७७ सक्रिय संक्रमित रहेको मन्त्रालयले जनाएको छ ।

देशभर कोरोनाभाइरस संक्रमण घटिरहँदा पछिल्लो २४ घण्टामा ९ वटा जिल्लामा मात्रै संक्रमित थपिएका छन् । तीमध्ये झापा, मोरङ, सुनसरी, महोत्तरी, भक्तपुर र सिन्धुपाल्चोकमा एक एकजना संक्रमित थपिएका हुन् ।

स्वास्थ्य मन्त्रालयका अनुसार आज काठमाडौंमा १२, ललितपुरमा ५ र चितवनमा २ जनामा संक्रमण देखिएको छ । थपिने संक्रमितको संख्या घटेसँगै काठमाडौं उपत्यकामा सक्रिय संक्रमितको संख्या ५९५ मा झरेको छ ।