प्रधानमन्त्री देउवाले बालुवाटारमा पार्टीका कुनैपनि बैठक नराख्ने

✍️ Nayapusta Desk ४ श्रावण २०७८, सोमबार १०:५२

काठमाडौँ । प्रधानमन्त्री शेरबहादुर देउवाले अब बालुवाटारको सरकारी निवासमा पार्टीका कुनै पनि बैठक नराख्ने भएका छन्।कांग्रेस युवा नेता गगन थापाले सामाजिक सञ्जालमार्फत् यस्तो जानकारी दिएका हुन्।

आफूहरुले पार्टी सभापतिसमेत रहेका देउवालाई बालुवाटारमा पार्टीको कुनै पनि बैठक नराख्न आग्रह गरेको र त्यसलाई देउवाले स्वीकार गरेको थापाको भनाई छ।

निवर्तमान प्रधानमन्त्री केपी शर्मा ओलीले बालुवाटारको सरकारी निवासलाई पार्टी कार्यालय जस्तो बनाएको भनेर आलोचना हुने गरेको थियो। ओलीले पार्टीका सबै बैठक र भेलासमेत बालुवाटारमै गर्दै आएका थिए।

दुई दिनअघि प्रधानमन्त्री देउवाले पनि बालुवाटारमा पार्टीको बैठक राखेपछि धेरैले देउवाले पनि ओलीकै क्रियाकलापलाई निरन्तरताा दिन थालेको भन्दै आलोचना गरेका थिए।

‘प्रम शेरबहादुर देउवालाई बालुवाटारमा पार्टीको कुनै पनि बैठक नराख्न अनुरोध गरेका छौँ,’ थापाले सोमबार बिहान सामाजिक सञ्जाल ट्वीटरमा लेखेका छन्, ‘उहाँले ‘पार्टी कार्यालयमा धर्ना भएको कारणले यो पटक बालुवाटारमा भएको हो। तर जे भए पनि अबदेखि त्यस्तो हुने छैन र गरिन्न’ भन्ने विश्वास दिलाउनु भएको छ।’