विश्वकप र एएफसी छनौट अन्तर्गत नेपालको खेल कान्तिपुर टिभीमा लाईभ हेर्न पाइने

✍️ नयाँपुस्ता डटकम १८ जेष्ठ २०७८, मंगलवार २२:१५

काठमाडौँ । कुवेतमा हुने फिफा विश्वकप तथा एएफसी एसिया कप छनोटअन्तर्गत नेपालले खेल्ने सबै खेलको प्रत्यक्ष प्रसारण कान्तिपुर टेलिभिजनले गर्ने भएको छ।

दोस्रो चरणमा नेपालले कुवेतमा तीन खेल खेल्दैछ। जसमा जेठ २० गते चाइनिज ताइपेई, जेठ २४ गते जोर्डन र जेठ २८ गते अस्ट्रेलियासँग खेल हुनेछ। जसको प्रत्यक्ष प्रशारणका लागि अखिल नेपाल फुटबल संघ एन्फा र कान्तिपुर टेलिभिजनबीच सम्झौता भएको छ।

एन्फाका तर्फबाट महासचिव इन्द्रमान तुलाधर र कान्तिपुर टेलिभिजनका मार्केटिङ हेड गौरी दाहालले सम्झौता पत्रमा हस्ताक्षर गरेका छन्।

नेपालले घरेलु मैदानमा खेल्नुपर्ने प्रतियोगिता कोरोना भाइरसका कारण सेन्ट्रल भेन्यूमा हुन लागेको हो।एसियाली फुटबल महासंघले समूह बीका सबै खेल कुवेतमा गराउने निर्णय अनुसार नेपालले कुवेतमा दोस्रो चरणका खेल खेल्न लागेको हो।

नेपालले खेल्ने सबै खेल नेपाली समय अनुसार राती पौने १० बजेबाट सुरू हुनेछ। प्रतियोगितामा नेपालले पाँच खेल खेल्दा चार हार र एक जित निकालेको छ।