मधेशमा जसपा र लोसपालाई ठुलो धक्का, सिके राउतको पार्टी अगाडि

सप्तरी l मधेशको राजनीतिबाट उदाएर प्रदेश र केन्द्र सरकारमासमेत सहभागी हुँदै आएका दुई मधेशवादी दलले यसपालिको चुनावमा धक्का खाएका छन् ।

महन्थ ठाकुर नेतृत्वको लोकतान्त्रिक समाजवादी पार्टी नेपाल (लोसपा) र उपेन्द्र यादव नेतृत्वको जनता समाजवादी पार्टी नेपाल (जसपा) को प्रारम्भिक नतिजा कमजोर देखिएको छ । यी दुई पार्टीले धक्का खाँदा मधेशमा भर्खरै उदाएको डा. चन्द्रकान्त राउत (सिके) नेतृत्वको जनमत पार्टीले अग्रता लिएको छ ।

Advertisement

जनमत पार्टीले मधेस प्रदेशको दुई सिटमा जित हात पारिसकेको छ । सप्तरी २ क र धनुषा ३ क मा यो पार्टीका उम्मेदवार विजयी भएका हुन् ।

प्रतिनिधिसभातर्फ सप्तरी २ मा जनमत पार्टीका अध्यक्ष डा. सीके राउतले फराकिलो अग्रता कायमै राख्नुभएको छ । जसपा अध्यक्षसमेत रहेका उपेन्द्रभन्दा दोब्बरभन्दा बढी मतसहित राउत अगाडि हुनुहुन्छ । राउतले मतान्तर बढाउँदै लैजाँदा यो क्षेत्रमा उपेन्द्र यादवे जित्ने सम्भावना कम हुँदै गएको छ ।

यहाँ २०७४ सालको चुनावमा तत्कालीन संघीय समाजवादी फोरमका अध्यक्ष उपेन्द्र यादवले फराकिलो मतान्तरले जित्नुभएको थियो । यसपालि यादव पराजित भएर राउत सांसद बन्ने सम्भावना बढ्दै गएको छ ।

संसदीय चुनावमै राउतको यो पहिलो सहभागिता हो । मधेशका अरु क्षेत्रको प्रारम्भिक मतपरिणाममा जसपा र लोसपाका अध्यक्षसहित शीर्ष नेताहरु फराकिलो मतले पछि देखिएका छन् । सत्ता स्वार्थमै सीमित भएको र मधेशका माग सम्बोधन गर्न नसकेको भन्दै यी दलप्रति त्यहाँका नागरिकले देखाउँदै आएको असन्तुष्टि यसपालिको चुनावमा देखिएको छ ।