बैतडीमा शव बोकेको जीप दुर्घटना, चार जनाको ज्यान गयो

✍️ नयाँपुस्ता डटकम २१ बैशाख २०७८, मंगलवार १६:५५

धनगढी । बैतडीमा वडा सदस्यको शव बोकेको जिप दुर्घटना हुँदा चार जनाको ज्यान गएको छ। दुर्घटनामा अन्य ६ जना घाइते भएका छन्।

चट्याङ लागेर मृत्यु भएका पञ्चेश्वर गाउँपालिका–६ का वडा सदस्य गोविन्द भण्डारीको शव बोकेर सदरमुकामतर्फ जादै गरेको से १ ज १८३ नम्बर जीप सोही वडाको गणमेश्वर मोडमा दुर्घटना भएको प्रहरीले जनाएको छ।

दुर्घटनामा परी पञ्चेश्वर गाउँपालिका–६ का २७ वर्षीय हिक्मत भण्डारी, अन्दाजी ३० वर्षीय डम्मरसिंह भण्डारी, ४० वर्षीय दीपक भण्डारी र ५० वर्षीय जितसिंह भण्डारीको ज्यान गएको जिल्ला प्रहरी कार्यालय बैतडीका प्रवक्ता प्रहरी निरीक्षक दर्शन खड्काले जानकारी दिए। उनीहरुको घटनास्थलमै ज्यान गएको उनले बताए ।

घाइतेहरूलाई उपचारका लागि जिल्ला अस्पताल पठाइएको खड्काले बताए। जीप सडकबाट करिब पाँच सय मिटर तल खसेको बताइएको छ।

चट्याङ लागेर ज्यान गुमाएका वडा सदस्यको शव परीक्षणका लागि जिल्ला अस्पताल लैजाने क्रममा जीप दुर्घटनामा परेको हो दुर्घटनाका सम्बन्धमा थप अनुसन्धान भइरहेको प्रहरीले जनाएको छ।