जोगवनी नाका हुँदै घर फर्किए KIIT का ७५ नेपाली विद्यार्थी

विराटनगर । भारत उडिसास्थित कलिंगा इन्स्टिच्यूट अफ इन्डस्ट्रियल टेक्नोलोजी (केआईआईटी)मा अध्ययनरत ७५ जना विद्यार्थी विराटनगरको जोगवनी नाका हुँदै नेपाल फर्किएका छन् । नेपाली विद्यार्थी प्रकृति लम्सालको शंकास्पद मृत्युपछि भारतमा बसेर पढ्ने विद्यार्थी घर फर्कन थालेका हुन् ।

जोगवनी नाका हुँदै बुधबार साँझसम्ममा ७५ जना विद्यार्थी घर फर्केको जिल्ला प्रशासन कार्यालय मोरङले जनाएको छ । यसरी फर्किनेमा मोरङका ३६, सप्तरीका १६, सुनसरीका ११ जना, काठमाडौँ र सिराहाका ३–३ जना, सर्लाही र जनकपुरका २–२ जना तथा ललितपुर र उदयपुरका १–१ जना रहेका छन् ।

Advertisement

शंकास्पद अवस्थामा लम्साल मृत फेला परेपछि कलेजमा अध्ययनरत विद्यार्थीको प्रदर्शनपछि उनीहरूलाई निकालेको थियो । लम्साललाई न्यायको माग गर्दै नेपाल तथा भारतका विभिन्न स्थानमा विरोध प्रदर्शन भएको छ । भुवनेश्वरस्थित कलेजको होस्टलमा बसेर बी–टेक तेस्रो वर्षमा अध्ययनरत लम्साल आइतबार मृत अवस्थामा भेटिएकी थिइन् ।