सांसद कोइरी निलम्बित भएको सभामुखद्वारा जानकारी

काठमाडौं । सभामुख देवराज घिमिरेले हत्या आरोप लागेका फरार नेकपा एमाले सांसद लक्ष्मी महतो कोइरी निलम्बित भएकोबारे प्रतिनिधिसभालाई जानकारी गराएका छन् ।

आइतबार बसेको प्रतिनिधिसभा बैठकमा प्रतिनिधिसभा नियमावली २०७९ को नियम २४८ को ३ बमोजिम सांसद कोइरीलाई वैशाख १९ गते निलम्बित गरी सूचना टाँस भएकोबारे उनले जानकारी गराएका हुन् ।

Advertisement

यसअघिको संसद् अधिवेशनको अन्तिम बैठकमा सांसद कोइरी बिरामी भएर बैठकमा आउन नसकेको जानकारी सभामुखले प्रस्तुत गरेपछि एमालेबाहेक दलका सांसदले आपत्ति जनाएका थिए । त्यसपछि सभामुख घिमिरेले अर्को अधिवेशनमा यसबारे निर्णय गर्ने प्रतिबद्धता जनाएका थिए ।

निलम्बित सांसद कोइरीमाथि ७ वर्षअघि भएको मधेस आन्दोलनका क्रममा सशस्त्र प्रहरी थमन विकको हत्या गरेको अभियोग लागेको छ ।