![top Inside [Health Ministry]](https://nayapusta.com/wp-content/uploads/2025/05/Nepallife.gif)
काठमाडौं l विगत १५ वर्षदेखि नेपाली गीतसंगीतको सिर्जनामा निरन्तर सक्रिय गीतकार तथा संगीतकार अनिल खनाल सम्मानित भएका छन्। राजधानीमा आयोजित एक विशेष समारोहका बीच खनाललाई ‘ग्लोबल स्टार प्रेरणादायी गीतकार सम्मान २०२६’ बाट विभूषित गरिएको हो।
दक्ष इन्टरनेशनलको आयोजनामा वैशाख ३१ गते सम्पन्न ‘ग्लोबल स्टार म्युजिक अवार्ड’मा उहाँको सांगीतिक योगदानको कदर गर्दै उक्त सम्मान प्रदान गरिएको हो। गुल्मीको धुर्कोटमा जन्मिएका खनालले सानै उमेरदेखि सुरु गरेको लेखन यात्राले अहिले परिपक्वता पाएको छ।
Advertisement
बहुमुखी प्रतिभाका धनी
खनाल केवल एक विधामा मात्र सीमित छैनन्। आधुनिक, चलचित्र, पपदेखि लोकदोहोरीसम्मका झण्डै २०० गीतहरू उहाँले नेपाली संगीत क्षेत्रलाई दिइसक्नुभएको छ। उहाँको प्रतिभाको चर्चा प्रा. डा. कृष्णहरि बरालले आफ्नो पुस्तक ‘गीत सिद्धान्त र इतिहास’ मा समेत गर्नुभएको छ, जसले उहाँको लेखनको प्राज्ञिक उचाईलाई पनि झल्काउँछ।
चर्चाको शिखरमा ‘भुइँचालो’
हाल बजारमा आएको चलचित्र ‘तिम्रो हुने कहिले’ मा समावेश गीत “सबले भन्छन् जिन्दगी त तेरो आहा छ, मनमा कति भुइँचालो छ मैलाई थाहा छ” यतिबेला श्रोतामाझ निकै लोकप्रिय बनेको छ। यो गीतले खनालको लेखन शक्तिलाई पुनः एकपटक प्रमाणित गरिदिएको छ।
स्वरुपराज आचार्य, देवी घर्ती, कुलेन्द्र विश्वकर्मा, टिका प्रसाई जस्ता दिग्गज कलाकारहरूसँग सहकार्य गरिसकेका खनालले आफ्ना प्रेरणाका स्रोतका रूपमा अङ्कल परमानन्द खनाल र सुवास रेग्मीलाई सम्झने गर्छन्।
आफ्ना शुभचिन्तकहरूसँग नजिक रहन खनालले आफ्नै आधिकारिक वेबसाइट www.anilkhanal.com.np पनि सञ्चालनमा ल्याएका छन्। यो सम्मानले आफूलाई नेपाली संगीत क्षेत्रमा अझै जिम्मेवारीका साथ लाग्न ऊर्जा मिलेको खनालले बताएका छन्।
