गण्डकीमा बुधबार बिहानै थपिए १८ संक्रमित, ज्यान गुमाउनेको संख्या ५७ पुग्यो

पोखरा । गण्डकी प्रदेशमा बुधबार बिहान १८ कोरोना संक्रमित थपिएका छन् ।

प्रदेशको गोरखा जिल्लाका १ जना तनहुँमा २ जना र नवलपुरमा १५ जना गरी १८ नयाँ कोरोना संक्रमित थपिएको स्वास्थ्य निर्देशनालय गण्डकीले जनाएको छ ।

Advertisement

संक्रमण पुष्टि हुनेहरुमा गोरखाको सुलिकोट ६ की १ महिला, तनहुँ आबुखैरेनी १ की १ महिला, देवघाट ८ की १ महिला, नवलपुर गैंडाकोटका ८ पुरुष तथा ३ महिला र कावासोती का २ पुरुष तथा मध्येविन्दु का २ पुरुष तथा १ महिलामा कोरोना पुष्टि भएको छ।

यो सँगै गण्डकी प्रदेशमा कोरोना संक्रमितको संख्या ६ हजार १ सय ५ पुगेको छ।

गण्डकी प्रदेशमा मंगलबार पोखरा महानगरका ३७ र मादी गाउँपालिकाका १ गरि कास्कीका ३८ जना सहित १२७ कोरोना संक्रमित थपिएका थिए।

मंगलबार थप ७४ जना डिस्चार्ज भएसँगै प्रदेशमा कोरोना संक्रमण मुक्त हुनेको संख्या ३ हजार ६ सय ७९ पुगेको छ।

थप २ संक्रमितको मृत्यु

गण्डकी प्रदेशमा कोरोनाबाट थप दुई पुरुषको मृत्यु भएको छ।

पोखरा स्वास्थ्य बिज्ञान प्रतिष्ठानको कोभिड उपचार केन्द्रको सघन उपचार कक्षमा म्याग्दीको धौलागिरी–७ का ८५ वर्षीय संक्रमित पुरुषको मंगलबार राति ८:२५ बजे उपचारको क्रममा निधन भएको स्वास्थ्य निर्देशनालय गण्डकीका निर्देशक डा. विनोद विन्दु शर्माले जानकारी दिए ।

त्यस्तै नवलपुर गैंडाकोट–७ का ५० बर्षीय पुरुषको मिति मंगलबार बिहान ९:५६ बजे चितवन मेडिकल कलेज चितवनको कोभिड सघन उपचार कक्षमा उपचारको क्रममा निधन भएको निर्देशक डा. शर्माले जानकारी बताए।

यो सँगै गण्डकी प्रदेशमा कोरोना संक्रमणबाट मृत्यु हुनेको संख्या ५७ पुगेको छ।