पत्रकारलाई रोटरी जर्नी अवार्ड २०२६ प्रदान

काठमाडौ, १२ असार। रोटरी इन्टरनेशनल डिष्ट्रिक्ट ३२९२ (नेपाल–भुटान) द्वारा देशभरबाट सात जना पत्रकारलाई रोटरी जर्नी अवार्ड २०२६ प्रदान गरिएको छ । शुक्रबार काठमाडौमा आयोजित समारोहमा उनीहरूलाई नगद ५१ हजारसहित उक्त अवार्ड प्रदान गरिएको हो ।

सोही समारोहमा काठमाडौंमा वरिष्ठ पत्रकार आदित्यमान श्रेष्ठलाई १ लाख १ हजार राशिको यज्ञप्रसाद आचार्य रोटरी लाइफ टाइम अचिभमेन्ट अवार्ड प्रदान गरियो । रोटरी जर्नीअवार्ड प्राप्त गर्नेहरूमा गोरखाका सुदीप कैनी, सिन्धुलीका सागर बुढाथोकी, पाल्पाका विजय नेपाल, सुनसरीका विकल रेग्मी, ओखलढुंगाका सरोज ढुंगेल, काठमाडौंकी उर्वसी बस्न्यात र बाँकेकी रूपा गहतराज छन् ।

Advertisement

समारोहका प्रमुख अतिथि रोटरी इन्टरनेशनल डाइरेक्टर नोमिनी बासुदेव गोल्यान, रोटरीका डिस्ट्रिक्ट गभर्नर विनोद कोइरालाले पत्रकारलाई पुरस्कृत गरे । कैनीले आधारभूत शिक्षा, साक्षरता र डिजिटल साक्षरता विधामा, बुढाथोकीले मातृ तथा शिशु स्वास्थ्य विधामा, पोखरामा कार्यरत पत्रकार नेपालले सामुदायिक र आर्थिक विकासमा, रेग्मीले खानेपानी, सरसफाइ र स्वच्छतातर्फ, ढुंगेलले रोकथाम र उपचार विधामा, बस्न्यातले वातावरण, जलवायु परिवर्तन र उत्थानशीलतामा र गहतराजले स्थानीय शान्ति र द्वन्द्व रोकथाम/समाधान विधामा अवार्ड जितेका हुन् ।

पत्रकारितामार्फत समाजमा सकारात्मक सिर्जना गर्ने पत्रकारलाई रोटरीले सन् २०११ देखि रोटरी जर्नी अवार्ड प्रदान गर्दै आएको छ। विगतमा लाइफटाइम अचिभमेन्ट अवार्डबाट वरिष्ठ पत्रकार भैरव रिसाल र भारतदत्त कोइरालालाई सम्मान गरिएको थियो ।
रोटरीले सेवा गर्ने क्षेत्रलाई आधार मानेर विभिन्न विधामा देशभरीबाट अनलाइन आवेदन माग गरेकोमा छनोट समितिले उत्कृष्ट पत्रकारको छनोट गरेको रोटरी जर्नी अवार्ड कमिटी अध्यक्ष सुरेश आचार्यले जानकारी दिए।

जुरी प्यानल कोअर्डिनेटर वरिष्ठ पत्रकार तीर्थ कोइरालाले पत्रकारको क्षमता आधारमा निकै स्वच्छ र पारदर्शी ढंगले छनोट गरिएको बताए ।
प्रमुख अतिथि गोल्यानले पुरस्कृत सम्पूर्ण पत्रकारलाई बधाई दिँदै यसबाट अब्बल र मेहनति पत्रकारलाई अझ अगाडि बढ्ने प्रेरणा मिल्ने बताए । उनले रोटरी एक इन्टरनेशनल संस्था भएको उल्लेख्य गर्दै समाजमा यसको कामबाट अहिले झन् पोजेटिभ सुनिन थालेको बताए ।
कार्यक्रमका अध्यक्ष डिस्ट्रिक्ट गभर्नर विनोद कोइरालाले रोटरीले समाजिक सेवा सँगसँगै पत्रकारलाई पनि बर्सेनि पुरस्कृत गर्दै आएको बताए । रोटरीका १२ लाख सदस्य रहेको उल्लेख गर्दै समाजमा भोकेस्नल सर्भिसलाई विश्वास गर्ने बताए । उनले भने, रोटरीले पेसागत मर्यादालाई उच्च सम्मान गर्छ। रोटरीले स्वार्थभन्दा माथि उठेर श्रम, पैसा, समय र क्षमता समाजमा डोजेट गर्ने काम गर्छ । रोटरीले गरेका कामलाई सकारात्मक ढंगले बुझिदिन पनि आग्रह गर्छु।
कार्यक्रम संचालन रोटरी जर्नी अवार्ड कमिटी अध्यक्ष सुरेश आचार्य, धन्यवाद ज्ञापन हिमाल पौडेल र पुरस्कृत पत्रकारको तर्फबाट आदित्यमान श्रेष्ठ, उर्वशी बस्न्यात र सरोज ढुंगेलले बोलेका थिए  ।