अन्ततः महानगरले चलायो अल्फा बिटाको अवैध संरचनामा डोजर

✍️ नयाँपुस्ता डटकम ९ भाद्र २०७९, बिहीबार १६:३७

काठमाडौँ । काठमाडौँ महानगरपालिकाले नयाँ बानेश्वरमा रहेको अल्फा बिटा कम्प्लेक्सको अवैध संरचनामा डोजर चलाएको छ । बिहीवार दिउँसो महानगरको दलबलसहित अल्फा बिटा कम्प्लेक्स पुगेर अवैध संरचना डोजर चलाएको हो ।

यसअघि, आज बिहान अवैध संरचना हटाउन पुग्नुभएका मेयर र कम्प्लेक्सका निर्देशक द्विराज शर्माबीच चर्काचर्की भएको थियो।

अल्फा बिटाले सडकपेटीमै पार्किङ गराइरहेको र नक्सामा उल्लेख भएभन्दा बाहेकको संरचना बनाएको भन्दै मेयर बालेन्द्रले तत्काल भत्काउन निर्देशन दिनुभएको थियो।

आफूले नक्सा पासअनुसार नै संरचना बनाएको निर्देशक शर्माले जवाफ दिएपछि मेयर साहले नक्सा माग्दा चर्काचर्की परेको थियो ।

अहिले महानगरले अवैध संरचना र पार्किङको नक्सा पास गरेर अरू नै प्रयोजनमा लगाउनेमाथि कारबाही थालेको छ । यसअघि सुन्धारा र न्युरोड क्षेत्रमा बनाइएका अवैध संरचना भत्काएको थियो ।