निगमका पूर्वअध्यक्ष चतुर्वेदीको घरको चार तलाबाट खसेर ज्यान गयो

✍️ नयाँपुस्ता डटकम २१ आश्विन २०७८, बिहीबार ११:५६

काठमाडौं । निर्माणाधीन घरको चौथो तलाबाट खसेर नेपाल वायुसेवा निगमका पूर्वअध्यक्ष रामाज्ञाप्रसाद चतुर्वेदीको मृत्यु भएको छ।

काठमाडौं –४ बुलबुलेस्थित निर्माणाधीन घरको चौथो तलाबाट खसेर उनको मृत्यु भएको प्रहरीले जनाएको छ ।

चतुर्वेदी निर्माणाधीन घरबाट बिहीबार बिहान ९ बजे खसेका थिए। उनले आत्महत्या गरेको हुनसक्ने अनुमान प्रहरीको छ। चतर्वेदीको बुलबुलेमै घर छ।

‘घरबाट खसेको खबर आएपछि वृत्त गौशालाको टोली घटनास्थलमा पुगेको थियो,’ परिसर प्रवक्ता प्रहरी उपरीक्षक रमेशकुमार बस्नेतले भने, ‘पोष्टमार्टमका लागि त्रिवि शिक्षण अस्पताल पठाइएको छ।’

घटनाबारे अनुसन्धान भइरहेको महानगरीय प्रहरी वृत्त गौशालाका प्रमुख प्रहरी नायब उपरीक्षक केशव भट्टराईले बताएका छन्।