कलंकीको भाटभटेनी सुपरमार्केटलाई २ लाख जरिवाना

✍️ नयाँपुस्ता डटकम २० चैत्र २०७८, आईतवार १९:३८

कलंकी । म्याद गुज्रिएका पेय पेय पदार्थ र खाद्य वस्तु बेच्ने कलंकीको भाटभटेनी सुपरमार्केटलाई दुई लाख जरिवाना गरिएको छ ।

जिल्ला प्रशासन कार्यालय काठमाडौं र वाणिज्य विभागको संयुक्त अनुगमन टोलीले आज (आइतबार) गरेको अनुगमनका क्रममा म्याद सकिएको मिरिन्डा र म्याद स्पष्ट नदेखिने सामान राखिएको पाइएपछि दुई लाख रुपैयाँ जरिवाना गरेको हो ।

उपभोक्ता संरक्षण ऐन, २०७५ अनुसार भाटभटेनीलाई उक्त रकम जरिवाना गरिएको काठमाडौंका सहायक प्रमुख जिल्ला अधिकारी दीपक पौडेलले जानकारी दिएका छन् । पौडेलका अनुसार, आगामी दिनमा म्याद गुज्रिएको सामान विक्री गरिएको पाइएमा थप कारावाही गर्ने गरि सचेत गराइएको छ।

पछिल्लो समय काठमाडौँमा पेट्रोलिय पदार्थ र खाद्य वस्तुको चरम अभाव हुन थालेपछि स्थानीय सरकारले बजार अनुगमनलाई तिब्र पारेको छ। अब निरन्तर बजार अनुगमनलाई थप चुस्त र प्रभावकारी बनाउँदै लैजाने जिल्ला प्रशासन कार्यालय काठमाडौँले जनाएको छ।

यसैगरी, अनुगमनका क्रममा कालिमाटीमा रहेको समर किराना पसल र चम्पारण स्टोरमा अनुगमन गर्दा मूल्य सूची नराखिएको, केही सामानहरुको म्याद सकिएको र उपभोक्ताको स्वास्थ्यमाथि खेलवाड गरेको भन्दै ५०–५० हजार रुपैयाँ जरिवाना गरिएको छ।