कलंकी चोकमा टिपरको ठक्करबाट मोटरसाइकल चालकको ज्यान गयो

✍️ नयाँपुस्ता डटकम २५ पुष २०७८, आईतवार ०९:५५

काठमाडौँ । काठमाडौँको कलंकीमा टिपरको ठक्करबाट मोटरसाइकलमा सवार एक जनाको ज्यान गएको छ भने अर्का एकजना गम्भीर घाइते भएका छन्।

बा ४ ख ६८४३ नम्बरको टिपरले बा १ ब ५४०१ नम्बरको मोटरसाइकललाई गएराति पौने १० बजे ठक्कर दिंदा मोटरसाइकल चालक बझाङको थलारा घर भई हाल ललितपुर बस्ने २४ वर्षीय वसन्त विष्टको ज्यान गएको हो।

दुर्घटनामा गम्भीर घाइते भएका मोटरसाइकल चालक विष्टको उपचारको क्रममा कलंकीस्थित शहिद मेमोरियल अस्पतालमा ज्यान गएको प्रहरीले जनाएको छ।

सोही दुर्घटनामा घाइते भएका बझाङकै चैनपुर घर भई हाल ललितपुरको धोविघाट बस्ने २६ वर्षीय निखिल बमको महांकालस्थित राष्ट्रिय ट्रमा सेन्टरमा उपचार भइरहेको छ।

टिपरसहित चालकलाई नियन्त्रणमा लिइएको प्रहरीले जनाएको छ।