कपनबाट हराएका बालक बिहारमा भेटिए

✍️ नयाँपुस्ता डटकम १३ आश्विन २०७८, बुधबार ०९:५२

काठमाडौं । काठमाडौंको कपनबाट हराएका चार वर्षिय बालक भारतको बिहारमा भेटिएका छन्। बूढानीलकण्ठ नगरपालिका वडा नम्बर १३ कपनबाट गत सोमवारदेखि हराएका बालक भारतको बिहारमा हिजो सकुशल भेटिएका हुन् ।

भारतको बिहार घर भई कपनको टहरामा बस्दै आएका विनोद शर्माका ४ वर्षीय छोरा पियुस सोमबार साँझ ४ बजेदेखि सम्पर्कविहीन भएका थिए । उनको खोजी गर्दा बिहारमा भेटिएको महानगरीय प्रहरी परिसर काठमाडौंका प्रहरी वरिष्ठ उपरीक्षक (एसएसपी) अशोक सिंहले जानकारी दिए ।

विनोदकै साथी शंकर दासले उनलाई बिहार लगेको खुलेको हो । भारतीय प्रहरीसँग समन्वय गरी उनीहरूको खोजी गरिएको थियो । बिहारमा भएका आफन्तहरूले पियुसको जिम्मा लिइसकेको एसएसपी सिंहले जानकारी दिए। यता शंकरमाथि भने प्रहरीले अनुसन्धान थाल्ने भएको छ।

उनले किन बालक लगे भन्ने अहिले नै खुलिनसकेको प्रहरीले जनाएको छ । हिजोसम्म पनि बालक सम्पर्कमा नआएपछि परिवारले प्रहरीको कन्ट्रोल नम्बरमा सम्पर्क गरेको थियो।

त्यसपछि प्रहरीले बालकको खोजी थालेको थियो। बालकका बाबु बिनोद र शंकर दुबै जना काठमाडौंमा सँगै शिशाको काम गर्ने साथीहरू हुन्।