मुख्यमन्त्री शंकर पोखरेल सवार गाडीमाथि ढुंगा प्रहार, प्रहरीद्वारा हवाई फायर

✍️ नयाँपुस्ता डटकम १८ आश्विन २०७७, आईतवार १४:०६

बुटवल । प्रदेश ५ का मुख्यमन्त्री शंकर पोखरेल सवार गाडीमाथि ढुंगा प्रहार भएको छ।

काठमाडौँबाट भैरहवा विमानस्थल ओर्लेर गाडीमा आउँदै गर्दा बुटवलको राजमार्ग चौराहा नजिक सिद्धार्थ कटेज अगाडि मुख्यमन्त्री सवार गाडी र उनको स्कर्टिङमा रहेका दुई वटा गाडीमाथि नेपाली कांग्रेसका कार्यकर्ताले ढुंगा प्रहार गरेका हुन्।

ढुंगा प्रहार भएपछि पहिल्यैदेखि राजमार्ग चौराहामा तैनाथ प्रहरीले हवाई फायर गरेको थियो। ढुंगा प्रहारबाट मुख्यमन्त्री सवार गाडी र स्कर्टिङमा रहेका २ वटा गाडीमा क्षति भएको छ।

प्रहरीले घटनामा संलग्न भएको आरोपमा कांग्रेस युवा नेता एवं प्रदेशसभा सदस्यका उम्मेदवार विष्णु पोखरेल, नेविसंघका केन्द्रीय उपसभापति मुक्तिराज पौडेल, सञ्चारकर्मी कमला पाण्डेसहित ६ जनालाई प्रहरीले पक्राउ गरेको छ।

प्रदेश राजधानी दाङ सार्ने प्रस्तावको विरोधमा कांग्रेस रुपन्देहीले जिल्ला बन्द गरेको छ। कडा सुरक्षाकाबीच मुख्यमन्त्री भैरहवाबाट बुटवल आउँदै गर्दा उनको गाडीमागि ढुंगा प्रहार भएको हो ।