नेपालमा एकै दिन १७ जना कोरोना संक्रमितको मृत्यु

✍️ नयाँपुस्ता डटकम ८ आश्विन २०७७, बिहीबार ११:०४

काठमाडौँ । नेपालमा पछिल्लो २४ घण्टामा थप १७ जना कोरोना संक्रमितको मृत्यु भएको छ। यो सँगै नेपालमा कोरोनाबाट ज्यान गुमाउनेको संख्या ४५३ पुगेको छ।

स्वास्थ्य मन्त्रालयका अनुसार मृत्यु हुनेहरुमा ५ महिला र १२ पुरुष छन् । संक्रमित हुनेहरुबाट मृत्युको प्रतिशतमा ०।६५ प्रतिशत छ। आज काठमाडौँ उपत्यकामा २ महिला र ४ पुरुषसहित ६ जनाको मृत्यु पुष्टि भएको छ।

यस्तै पछिल्लो २४ घण्टामा देशभर थप १४ सय ९७ जना कोरोना संक्रमित थपिएका छन्।

बिहीबारको नियमित प्रेस ब्रिफिङमा स्वास्थ्य मन्त्रालयका प्रवक्ता डा जागेश्वर गौतमले सो जानकारी दिएका हुन्।

यस्तै देशभर सक्रिय संक्रमितको संख्या १८ हजार ४३७ रहेको छ। जसमा संस्थागत आइसोलेशनमा ८ हजार ६१४ जना रहेका छन् भने होम आइसोलेशनमा ९ हजार ८२३ जना रहेका छन्।