देशका १० स्थानमा कोरोना परीक्षण सुरु, ९,१६८ जना क्वारेन्टाइनमा

काठमाडौं । सातै प्रदेशका १० स्थानमा कोरोना भाइरसको परीक्षण सुरु भइसकेको स्वास्थ्य तथा जनसंख्या मन्त्रालयले जनाएको छ । मन्त्रालयले सोमबार गरेको पत्रकार सम्मेलनमा मन्त्रालयका प्रवक्ता डा. विकास देवकोटाले जानकारी दिएका हुन् ।

आइतबारबाट धुलीखेल अस्पताल, भरतपुर अस्पताल र भैरहवा अस्पतालमा सुरु भएसँगै हाल १० स्थानमा कोरोना परीक्षण सुरु गरिएको उनले जानकारी दिए। सातै प्रदेशका अस्पतालमा सोमबार १०७ जना आइसोलेसनमा उपचार गरिरहेका उनले जानकारी दिए।

Advertisement

“काठमाडौ उपत्यकामा १२ जना र उपत्यका बाहिर ९५ जना आइसोलेसनमा भर्ना भएका छन्,” उनले भने, “सोमबारसम्म देशैभर ९ हजार १ सय ६८ जना क्वारेन्टाइनमा रहेका छन्।”