तुला राशिका लागि कस्तो रहला २०७८ साल ? हेरौँ वार्षिक राशिफल

तुला राशि हुनहरुका लागि वि. सं. २०७८ सालको वर्ष मिश्रित छ । केही पक्षमा संघर्ष एवं उथलपुथलप्रद पनि देखिएको छ । बढी आशा अपेक्षा एवं चाहना र आसक्ति गरेको काममा बढी सास्ती मिल्ने तर खासै महत्त्व नपाएको काम बनेर गर्जो टर्ने हुनेछ । पारिवारिक, छरछिमेक, समाज, सहकर्मी आदि पक्षमा ग्रहले विपरित प्रभाव गर्न खोजिरहेको हुनाले बढी साथ सहयोगको अपेक्षा नगर्नु सुखकर हुनेछ ।

केही विपरित गोचरग्रहको अवस्था रहेपनि सत् नछाड्ने र स्वकर्ममा रत् रहने तथा संयमपूर्वक बुद्धिले काम लिने कर्मयोगीहरूले संभावित खतिक्षतिलाई टार्न सकिने छ । निस्कामयोग सिद्धान्तलाई आत्मसात गर्दै कर्तव्यको पालना गर्नु उचित हुनेछ । हिम्मत नगिराई सकारात्मक सोँचको साथमा अघि बढ्नु तपाईको लागि बुद्धिमानी हुनेछ । दलालीकरणबाट बँचेर विदेश यात्राको प्रोसेस गर्नु अनुकूल रहनेछ ।

Advertisement

महादशा आदिमा अकारक तथा प्रतिकूल दशा चल्नेहरुलाई पारिवारिक कष्ट तथा रोग–शोकको भय छ । विपरित प्रभावले दाम्पत्य एवं प्रेम सम्बन्धको मधुरता घटाउनसक्ने छ । दैविक विपत्ति, व्यवहारिक एवम् व्यवसायिक समस्याहरू आइलाग्नसक्ने छन् । जग्गा तथा घरघडेरीको किनबेचमा फँसिने समय छ । सितिमिति कसैको भरोसा नगरेकै राम्रो हुनेछ । मुद्धामामिला पर्नसक्ने सम्मको ग्रहगोचर रहेकाले सावधानी अप्नाउनु उचित हुनेछ ।

सञ्चित धनको खर्च हुने जोखिम छ, पाइल्स, नाक,कान,घाँटीसम्बनधी रोग, लिभर एवं पाचनक्रियासँग सम्बन्धित उदर रोग आदिको भय छ । अन्य दीर्घ स्वास्थ्य समस्याको पनि भय रहन्छ नै । खाईपाई आएको सेवा सुविधाबाट च्यूत गराउन ग्रहगोचरले बल गरी रहेको हुनाले संबन्धित व्यवहार गर्दा निकै सावधानी अप्नाउनु बुद्धिमानी हुनेछ । कृषि एवं पशुचौपाया आदिमा ठूलो लगानी नगरेकै उचित हुनेछ ।

वर्षको उत्तरार्धबाट तसै सुविस्ता महसूस हुनेछ तर पूर्णरुपमा अनुकूल भन्न सकिन्न । ग्रह उपचारका उपायहरु अपनाएर अघि बढ्दा बढी सफलता हातपार्न सकिने छ । अध्ययनमा पनि अनकूलता बढ्ने छ । विवाह योग्य युवा–युवतीको विवाह बन्धनको योग जुर्ने देखिन्छ । पेशागत उन्नति बढ्ने छ ।

यो वर्ष तुला राशिका विद्यार्थीहरुले माता सरस्वतीको भक्ति स्तुति र अन्यले महावीर हनुमान, भैरवदेव र माता बंगलामुखीको आराधना गर्नु शुभदायक हुनेछ ।