सडक किनारा बम विस्फोट हुँदा एकै परिवारका ६ जनाको मृत्यु

✍️ नयाँपुस्ता डटकम २८ जेष्ठ २०७६, मंगलवार १९:३८

कान्दाहार । अफगानिस्तानको दक्षिणी प्रान्त कान्दाहारको दान्द जिल्लाको एक सडकमा राखिएको बम विस्फोटमा परी ६ सर्वसाधारणको मृत्यु भएको छ। सो प्रान्तमा प्रहरी अधिकृत जमाल नसिरले सो घटनाको पुष्टि गरेका छन्।

आतङ्ककारीहरुले दान्द जिल्लाको सडक किनारमा राखेको बममा एक कार ठोक्किँदा दुई पुरुष, दुई महिला र दुई बालबालिकाको मृत्यु भएको बीबीसीले जनाएको छ। बम आक्रमणमा मारिएका सबै व्यक्ति एकै परिवारका रहेको बताइएको छ।

कान्दाहार प्रान्तको ठूलो भागमा आत्मघाती र सडक किनारमा बम राख्न सक्रिय रहेका तालिबान लडाकू समूहले भने यस विषयमा केही टिप्पणी गरेका छैनन्।