बंगलादेशको एक आवासीय भवनमा आगलागी, ७० जनाको मृत्यु

काठमाडौं । बंगलादेशको राजधानी ढाकामा अवस्थित एक भवनमा आगलागी हुँदा कम्तिमा ७० जनाको मृत्यु भएको छ।

४० जना गम्भीर घाइते भएका छन्। सरकारी अधिकारीहरुले मृतकको संख्या बढ्न सक्ने बताएका छन्।

Advertisement

राजधानी ढाकाको पुरानो शहरको चोक बजारस्थित एक भवनमा सबैभन्दा पहिलो आगो देखिएको थियो। यो आवासीय भवनमा केमिकलको गोदाम पनि थियो। केमिकल र प्लास्टिकका कारण आगो चाँडै फैलिएर छेउका भवनमा पनि क्षति पुगेको छ।

आगो निभाउनका लागि अग्नि नियन्त्रकसहित ३० वटा गाडी घटनास्थलमा तत्कालै परिचालित गरिएको थियो। ९५ प्रतिशत आगो निभाइसकिएको र खोज अभियान जारी राखेको अग्नि मिसनका प्रमुख अहमद खानले बताएका छन्।

उनका अनुसार आगो लाग्नुको कारण पत्ता लागेको छैन। ‘कतिपयले सीएनजी सिलिण्डर पड्किएर आगो लाग्न सुरु गरेको बताएका छन्। तर जाँचपछि नै वास्तविक कारण पत्ता लाग्ने छ,’ अहमदले बीबीसीसँग भनेका छन्।