गायक सापकोटाले ल्याए स्याङजा चिनाउने ऐतिहासिक गीत (भिडियोसहित)

गोविन्द मरासिनी/काठमाडौं । स्याङ्जा जिल्लाको समग्र पक्षलाई समेटेर ‘आई लभ यू स्याङजा, वि लभ यू स्याङ्जा’ गीत सार्बजनिक गरिएको छ । स्याङजाका चर्चित गायक लोकनाथ सापकोटाले उक्त गीतको सृजना गरेका हुन् ।

गीतको लेखन, निर्देशन, संगीत तथा परिकल्पना र आवाज सापकोटा स्वयमको रहेको छ भने उनलाई तारा श्रीस मगरले साथ दिएकी छिन् । गीतले स्याङजा जिल्लाको धार्मिक, पर्यटन एवं औधोगिक सहित सबै पक्षलाई समेटेको छ । जिल्लामा रहेका विभिन्न ऐतिहासिक एवं धार्मिक पक्षका बारेमा देश सहित विदेशमा समेत जानकारी दिने उद्देश्यले गीतको सिर्जना गरिएको र स्याङ्जा जिल्ला हरेक किसिमले वास्तवमै सुन्दर र राम्रो भएको सन्देश दिन खोजिएको गीतका सर्जक सापकोटाले बताए ।

Advertisement

गीतको भिडियोमा स्याङजाका सुन्दर स्थानहरु चण्डी भन्ज्याङ, चित्रे भन्ज्याङ, पञ्चासे, बाँगे, बाङसिङ, चापाकोट, सतौ कोट, भिरकोट, बहाकोट एवं प्रशिद्ध धार्मिक स्थलहरु पञ्चासे धाम, छाङछाङ्दी, राम्दी, आलाम देवी, सेतीबेनी, कालीगण्डकी, चण्डीकालिका र पर्यटकीय स्थलहरु दरौं सिरुवारी, स्वरेक मैदान, सिरकोट, बहाकोट, भालु पहाड लगायतका स्थानहरु देख्न पाईन्छ ।

देशको राजनीतिक अवस्थामा उल्लेखनीय प्रगति र सुधार नआईरहेका बेला आफूले सबै राजनीतिक दलका नेता तथा कार्यकर्तालाई एउटै म्यूजिक भिडियोमा अटाएर स्याङ्जामा राजनीतिक एकता सकारात्मक भएको भन्ने सन्देश पनि गीतले दिने सापकोटाको दाबी छ । गीतमा स्याङ्जा जिल्लाबाट देशका उच्च स्थानमा पुगेका विभिन्न व्यक्तिहरु, चर्चित कलाकारहरु, राजनीतिक दलका स्थानीय नेता तथा कार्यकर्तासहित करिब २ हजार भन्दा वढी स्याङ्जालीहरुको अभिनय रहेको छ ।

गीतको सार्वजनिक कार्यक्रममा उपस्थित अतिथीहरुले स्याङ्जा जिल्लालाई देश सहित विदेशमा चिनाउन गीतले महत्वपूर्ण भूमिका खेल्ने बताउँदै रचनाकार सापकोटालाई धन्यवाद सहित शुभकामना दिएका थिए ।

रिकेश भण्डारीले सम्पादन गरेको उक्त गीतको छायाकन टंक केसी, श्री गुरु र गिरधारी पोखरेलले गरेका हुन् ।

भिडियो हेर्नुहोस्, स्याङ्जा चिन्नुहोस् :