Under Menu Ad KTM

भोलि सार्बजनिक बिदा !

काठमाडौँ । सरकारले भोलि माघ शुक्लपक्ष पञ्चमी तिथि वसन्तपञ्चमीका अवसरमा शिक्षण संस्थालाई बिदा दिएको छ । सरकारले भोलि (बुधबार) सरस्वती पूजाका अवसरमा शिक्षण संस्थाका लागि बिदा दिएको हो ।

माघ शुक्ल पञ्चमीका दिन मनाइने ‘श्रीपञ्चमी’ पर्व भोलि विद्याकी अधिष्ठात्री देवी सरस्वतीको निष्ठापूर्वक पूजा–आराधना गरी मनाइँदै छ। यसअघिका वर्षमा जस्तै यस वर्षपनि सकारले श्रीपञ्चमी वा वसन्तपञ्चमीका दिन सार्बजनिक बिदा दिएको हो ।

वैदिक कालमा वसन्त ऋतुको मधुमासमा किदा अर्थात श्रीपञ्चमीका दिन विद्याकी देवी सरस्वतीको पूजा–आराधना गर्ने प्रचलन छ । विशेषगरी श्रीपञ्चमी पर्व विद्यार्थी, कर्मचारी, युवा युवती, गीतकार, संगीतकार, कलाकार लगायतले देवी सरस्वतीको पूजा गरी मनाउँछन् ।

चन्द्रमा जस्तो गोरो वर्ण भएकी तथा हातमा वीणा र पुस्तक लिएकी विद्याकी देवी सरस्वतीलाई भक्तजनहरूले भारती, शारदा, हंसवाहिनी, जगन्माता, वागीश्वरी, कौमारी, वरदायिनी, बुद्धिदात्री, ब्रह्मचारिणी, चन्द्रघण्टा र भुवनेश्वरीजस्ता नामले पुकार्छन्।

विद्या र सिर्जनाकी देवी भएकाले विशेष गरी साहित्यकार, कलाकार, पत्रकार, शिक्षक र विद्यार्थी आ–आफ्ना कला–साधनाका वस्तु कलम, कापी, कुची र वाद्ययन्त्र आदिलाई सरस्वतीका रूपमा पूजा–आराधना गर्छन् । सरस्वतीलाई तान्त्रिकहरूले तन्त्र सिद्धिका लागि तारादेवीका रूपमा मान्छन्।

सूर्य उत्तरतिर लागी दिन लामो हुने र वसन्त ऋतु प्रारम्भ हुने विश्वासका साथ आजको दिनलाई ‘वसन्त पञ्चमी’ पनि भनिन्छ । ऋग्वेदमा वाग्देवीका नामले प्रसिद्धि पाएकी ब्रह्माकी अर्धाङ्गिनी ब्रह्मायणीको पूजा उपासनाले सबै प्रकारको ज्ञान, सिद्धि र सद्बुद्धि प्राप्त हुने उल्लेख छ। यसैकारणले सरस्वती पूजालाई ठूलो महत्व दिइन्छ । आजका दिन सरस्वतीको पूजा गरी विद्यारम्भ गरेमा सर्वसिद्धि प्राप्त हुन्छ भन्ने विश्वास छ।

आजका दिन विवाह, व्रतबन्ध, गुफा राख्ने र बेलविवाह (इही) जस्ता सामाजिक तथा धार्मिक कार्य गर्न साइत हेर्नुपर्दैन भन्ने मान्यता छ । यस वर्ष भने शुक्र अस्त भएकाले विवाह, व्रतबन्ध जस्ता कर्म यस पर्वमा गरिँदैन। यस दिन बालबालिकालाई शिक्षारम्भ गराउने र नाक–कान छेड्न पनि शुभ मानिन्छ।

Loading...