Under Menu Ad KTM

पोखरा विमानस्थल : भव्य उद्घाटनको १५ दिनमै भयानक दुर्घटना

काठमाडौं । पोखरामा नयाँ अन्तर्राष्ट्रिय विमानस्थल उद्घाटनको १५ दिनमै विमान दुर्घटना भएको छ। नयाँ विमानस्थलको पुष १७ गते प्रधानमन्त्री पुष्पकमल दाहालले उद्घाटन गरेका थिए। उद्घाटनकै १५ दिनमा पोखरा अन्तर्राष्ट्रिय विमानस्थलनजिकै विमान दुर्घटना भएको छ।

यस्तै, आज पोखरामा दुर्घटना भएको यति एयरलाइन्सको विमान पोखरा अन्तर्राष्ट्रिय विमानस्थलमा पहिलो पटक अवतरण गर्ने पहिलो विमान थियो।  पुस ७ गते क्याप्टेन कमल केसीसहितको चालक दलले यही विमानबाट पोखरा अन्तर्राष्ट्रिय विमानस्थलमा पहिलो डेमो उडान गरेको यतिका प्रवक्ता सुदर्शन बर्तौलाले बताए।

उक्त विमानमा ३ जना बच्चा, ३ जना बृद्ध र चालकदलका ४ जनासहित ७२ जना यात्रु सवार रहेका थिए। काठमाडौंबाट पोखराका लागि उडेको ९ एन-एसीएनसी विमान बिहान साढे १० बजे उडेको थियोभने अवतरण गर्ने क्रममा करिब ११ बजेर १० मिनेट जाँदा पोखरा विमानस्थल नजिक फेवा खोँचमा दुर्घटना भएको त्रिभुवन विमानस्थलका महाप्रबन्धक प्रेमनाथ ठाकुरले जानकारी दिए।

अहिले विमान दुर्घटना भएको ठाउँमा आगोको मुस्लो उठेको छ। स्थानीय, सुरक्षाकर्मीलगायत घटनास्थलमा आगो निभाउने प्रयासमा लागेका छन्। विमान क्याप्टेन कमल केसीले उडाएका थिए। यतिका प्रवक्ता सुदर्शन बर्तौलाका अनुसार विमानमा १० जना विदेशी यात्रु पनि सवार रहेका थिए।

Loading...