अर्थमन्त्री डा. युवराज खतिवडाद्वारा पोखरा रंगशाला निरीक्षण

✍️ नयाँपुस्ता डटकम ४ आश्विन २०७६, शनिबार १९:०२

रिजन नेपाल

पोखरा । अर्थमन्त्री डा. युवराज खतिवडाले शनिबार निर्माणाधीन पोखरा रंगशालाको अवलोकन गरेका छन् । उनले निर्माणाधीन फुटबल मैदान, क्रिकेट मैदान, आर्चरी मैदान, बहुउद्देश्यीय कभर्ड हल निरीक्षण गरे ।

सागलक्षित गरी निर्माणाधीन रंगशालाका विभिन्न भौतिक संरचना अवलोकन गर्दै निर्माणमा सरकारले बजेट सुनिश्चित गरेको पनि बताए । उनले खेल हुन अब साग आउन करिब ७० दिन बाँकी छँदा खेलकुद संरचनाको काम अनुसार नै बजेटको सुनिश्चित गर्दै जाने बताए ।

उनले अब बहसमा नलागी पूर्वाधार निर्माणमा आवश्यक बजेटका लागि अर्थ मन्त्रालयबाट कुनै अवरोध नहुने बताए । उनले भत्किएका विद्यालयको भवन निर्माण नगरी खेलकुदमै सोचेजस्तो लगानी असम्भव रहेको पनि बताए ।

उनले निर्माणाधीन भौतिक संरचनाको गुणस्तरीयताका लागि स्वयं निर्माण कम्पनी जिम्मेवार बन्नुपर्ने पनि बताए । अर्थमन्त्री डा खतिवडाले सागमा सबै देशका खेलाडीको सहभागिता सुनिश्चित रहेको बताउँदै बाँकी दिनमा युद्धस्तरमा तयारीमा लाग्न सबैलाई आग्रह गरे ।

राष्ट्रिय खेलकुद परिषद सदस्य राजेश गुरुङले मन्त्री डा. खतिवडालाई रंगशालामा निर्माणाधीन पूर्वाधारका बारेमा ब्रिफिङ गरेका थिए। यस्तै, सागका लागि बन्द प्रशिक्षणमा रहेका पुरुष राष्ट्रिय ह्याण्डबल खेलाडीहरुलाई भेटेर सफलताको कामना गरे।